من روائع الشاعر المغربي/سعيد هجري موسى/***عسل الصابرة ***
***عسل الصابرة ***
و أنا من بكري
طابعين ليا اسيادي الرياس
ضارب سداس ف خماس
بعنايتي هاز الراس
هاز حملي نجري
ما نديها ف امواج
عقدة مور عقدة
نعبر كلامي عاد نݣول
الخطوة بالقياس
عطاني الله الفول
واعطاني الضراس
ما تهمني رياح
و لا بحر هاج
شط السلامة
بجاه الله نلقاه
ياك أنا عبد الله
عبد من عبيدو
و اللي ما عندو سيدو
عندو للاه
التليس عامر
و شلا مطامر
فايضة بالبركة
و الخير خامر
طابعينو الوالدين
و عارفيني بوهالي
كريم حنين
نرد الضغمة من فمي
و نعطيها للمسكين
المزود ما يحس بيه
غير المخبوط بيه
خلوا ذاك الجمل راݣد
و خلوني ساكت
ما نعري على ݣلبي
ما نزيد نفاݣد ...
من ݣال حدية وزعات
و الوزيعة ما تحصرنا
فيها كاملين
ما جمعتنا خاوة
ما جمعنا دين
ما بقى من الخيمة
يطلع دخان
ما بقات محنّة
بين الجيران
ما بقات حنة
تبان تحت الصيݣان
و لا مرود يكحل الحجبان
الكلام الزين تصدّا
و بْهات لونو
والصدق ݣفا و صدا
و اعطى بالدْبٓر
ما بقى سر
ف بير يصونو
هب الريح ف الوطى
ولٌى يٓعثٓر
و الخو غدار يغدر
و يحسد خيو و يخونو
ما ݣٓرٌو شدوݣة
عاد لحيس اصباع
البٓرٓكة هزت رحيلها
و الرزق ضاع
و البݣرة بكات
ف موت الݣزار
طاحت و قواو
جناوي المرمادة
البير وكح من ماه
على غرادة
لا ݣلة على الظهر
بقات لا برّٓادة
و المـطافي طفات
و جفات
و لا من جاب
صحة الأخبار
سعيد هجري موسى/بوزنيقة
Commentaires
Enregistrer un commentaire