زجل رائع من روائع/سيدْ_الرجالة/للشاعر المغربي/شرقان رشيد

#سيدْ_الرجالة

مصير لهمَـامْ ، نجمُه يِسْـمَــا 

و دُرُه يسْني ف عماق لبْحُورْ 

وجهد اللي راد يتنمَر ايتْنَعْمَة

وعند الصح تلقا راسه محدورْ

ما عرفاتو خيل . . برݣي ودهمة

ما عرفاتو طيار . . بياز ونســور 

ماعرفاتو غْيَّبْ وَ كْيَّفْ امظلْـمَة 

ماعرفانو بوادي وَحْضَّرْ ودْشُورْ 

ما تغنى بتبوريدا، زْجّلْ ونغمة

ما فْخَرْ بْكُمّيَة والسِيفْ لْمَشهُورْ 

لقوي منهو اللي لْعَيْبُه اكْــمَى

لا منهو أمحزمْ ب لبْلا واضرورْ 

دمايْ لݣلوب ف الْعُقْبة ينْدْمَا

و جبَّارْ لخواطر فعله مشكور 

يوم عْلَى يومْ لمْداوم ينْـمَى

واللي يْبَطّلْ ف عيْشو مقهورْ 

لـشْجارْ الصالْحَة تمرْها يهْمَى

والْخَارفَة، ديكْ سَاݣُها منخُورْ 

الكاتبة تاتيكْ من بينْ الزحمة

واللي اتعطلت رزقها مَوْخُورْ 

سيدْ الرجالة، راجل عَنْدْ الكَلْمَة

وعِيفْتْهُمْ لي لْخيرْ عَنْدُه منكورْ 

الرامي راه ينْرمَى بـاش ارْمَى

دِ ليامْ نوبَة، والدهر لزومْ يدُورْ 

ويا ويح بنادم شوفته امغمة

وكل جوراجه اتنادي بالديجورْ

.......

شرقان 

رشيد